Costa Rica
09.12.2016
Wier si güet glandet und hei der erst Tag in San José verbrunge. Am Morge isches troche gsi und am Namittag hets afa rägne.
12.12.2016
Sit dum Samtag Morge siwer im Tortuguero National Park. HIe isches richtig schön. Am Samstag Namittag heiwer mim Boot en Üsflug durch die Kanäl gmacht un dhei ganz viel Tieri gseh. Bis am Sunntag Morge hets grägnet. Pünktlich zer Wanderig am 9i hets üfghert. Wier si ufma Pfad durch du Jungel gluffe, isch no güet gsi. Hei es schlafents Opossum gseh und es paar Papagei. Am Mäntag nam Früehstück siwer mim Bus wieder zrugg nach San José, wos wieder grägnet het.
14.12 und 15.12
Wier si va San Jose nach Sabana Redonda gfahre. Da siwer iner chleine härzige Underkunft gsi. Va da üs siwer zum Volcano Poas gfahre und hei dene erkundigt. Wower zum Volcano Barva hei welle, isch leider biner Ranger-Station nieme da gsi und so heiwer nit ichenne. Drum heiwer halt en gmietliche Namittag gka :-)
17.12.16
HIte siwer im National Park Monteverde gsi. Das isch en sehr schöne National Park. Zu dem Hotel wo wier gschlafe hei, het en eigene chleine Urwald gkehrt, wome sälber het chenne umenandlöife. Am Namittag siwer abgholt worde und zuma andere Cloud Forest gange. Da hets en Rundwäg gka wo uber 8 Hängebrücke gfiert het. Das isch sehr schön gsi, will mu ine Böimgipfel isch gsi.
22.12.16
Hite isches endli so wit gsi und der Ralf het schine ersti Töichgang im Meer gka iner Bucht vor dum Playa del Coco, D Sicht isch zwar nit so güet gsi aber trotzdem heder Muräne, Kugelfischa, Stachelrochen und jensti chleini farbigi Fischini gseh.
23.12.16
Hite siwer zum Rincon de la Vieja National Park gfahre. Das isch en aktive Vulkan in glichnamige NP. Zum Vulkan chame nit aber unina hets en schöne Rundwäg, wome siedendi Schlammtümpla cha gseh und äs schmeckt fein nach füle Eier. ;-)
26.12.16
Hite siwer bim Volcano Arenal NP gsi. Leider isch bewölkt gsi so daswer der Gipfel nit gseh hei. Im Park gits en Rundwäg durch de Wald. An einem Ort chame der Lavafluss vo 1991 gseh. Isch nit so imposant wie uf Hawaii aber ganz nätt. En güete Üsblick ufe Arenalsee het mu öi.
27.12.16
Hite heiwer en sehr schöne Tag gka. Zerscht siwer im Baldi Hot Spring schön bi 35-45 Grad warmem Wasser ga bädele und am Abe hewier es Fondue gnosse im Pequeña Helvetia.
30.12.16
HIte siwer bim Markus üsem Aargau ufen Schokolade-Tour gange. Das isch sehr idrücklich gsi. Wier hei öi chenne degustiere, schmeckt andersch wie der iner Schwiz wiler nit conchiert wird, aber trotzdem sehr fein.
02.01.17
Hite morge am sägschi siwer mim Kanu ini Mangrove gfahre, das isch sehr toll gsi. Durch die Gezeiten isch zruggändige z Wasser no bis knapp zune Knew cho. Isch no spannend gsi.
05.01.17
Hite siwer im NP Manuel Antonio gsi. Das isch en Nationalpark am Meer. Sehr touristisch, aber öi schön.
07.01.17
Hite verläwer das schöni Land Costa Rica und fleige ver ein Nacht uf Los Angeles und am 08.01.17 geits nar witer uf Hawaii. Wier fröie nisch sehr, denn z Manu und d Céline z träffe.