Kambodscha

30.03.17

Wier si gester va Auckland uber Kuala Lumpur in Siem Reap glandet und hei z Zimmer bezoge. Wier hei sehr es schöns Hotel mit ra güete Lag. Hite siwer im Angkor National Museum gsi. Isch sehr interessant gsi. Mu lehrt viel vaner Gschicht uber z Khmer-Rich (9. Bis 15. Jahrhundert) und di Königa und gseht viel Statue und Buddhas, wo zwische 500 und 1400 Jahr als sind.

Nam Museum siwer im Kinderspital Kantha Bopha ga Blüet spände. Der Schwizer Chinderarzt Beat Richner isch im Zämehang mit dum Schiwezerische Rote Chriz ine 70er Jahr hie gsi und het mit der Machtubernam vane Rote Khmer z Land verla. Nam Krieg het nu di Kambodschanisch Regierig agfrägt, ober z Spital chunt cho wiederüfbüe. Är isch den 1992 wieder zrugg uf Kambodscha cho und het bis hite 5 Spitäler ver Chinder errichet, 4 in Phnom Penh und eis in Siem Reap. Dischi Wucha isch nar ine Medie gsi, daser uf gsundheitliche Grind vaner Leitig zrugggiträte isch und wieder iner Schwiz isch. Sehr schad und d Lit sind trürig, daser nimme hie isch.

Nam Blüetspände siwer z Ticket ver di Templa ga chöife und hei scho mal en chleine Üsflug zu einum gmacht, wome en schöne Sunneundergang selti gseh. Leider isches bewölkt gsi.

31.03.17

Hite am Morge siwer vam Gnean mit schinum Tuk Tuk abgholt worde. 2 Chilene sind öi no derbi gsi und wier hei einigi Tämpla gseh. Am Schluss siwer no nach Angkor Wat gange, der gregsti Tämpelkomplex vaner Wält. Jede König het schine eigen Tämpel gibüht gka und sumi sind no sehr güet erhalte. Einigi sind restauriert worde oder schi sind gat dra. Uf jede Fall isches sehr interessant gsi. Öi d Underschieda vaner verschiedene Jahrhundert und öi der Wägsel vam Hinduismus zum Buddhismus gseht mu güet. Der letschti König het der Religionswägsel vorgno. No bis hite sind die meiste Kambodschaner buddhistisch, hent aber öi no einige Ifluss vam Hinduismus. Äs wird vermüetet, dass bim Höhepunkt va Angkor bis zu einer Million Mänsche bi dene Tämpla gwohnt hent. In Angkor isch öi d Höiptstand vam Khmer-Rich gsi, wo schich uber Kambodscha, Laos, Teila va Vietnam und Thailand erstreckt het. 

01.04.17 

Hite am Morge siwer am 5i abgholt worde und hätti der Sunneüfgang bi Angkor Wat selle gseh. Leider hets iner Nacht grägnet und äs isch immerno bevölkt gsi. Nar siwer zum Tempel Ta Prohm gfahre, da isch en Teil vam Film Tomb Raider gidräit worde. Zum Schluss siwer no nach Angkor Thom gfahre, der Tämpel isch im Name vam letschte grosse König gibüht worde und zu schiner Zit öi d Höiptstadt gsi. 

02.04.17

Hite isch ische letscht Tag in Siem Reap. Hite siwer zunera Silk Farm gfahre. Da mächentsch vane Röipe, uber z Spinne und Wäbe alles sälber. Nam ipuppe wärdend di Kokons iner Sunna gitrochnet und nar im heisse Wasser gibadet und d Sida üsgröllelet. D Sida wird öi sälber in Handarbeit zum färbe vorbereitet. Sehr spannend. D Maschine sind wie vor gfühlt 100 Jahr aber löifend no einwandfrei. 

03.04.17

Hite siwer z erscht mal mit ma Bus gfahre. Het alles wunderbar giklappet, hei ufem Ticket ische Sitzplatz gka und der heiwer öi vercho. Isch en mittelgrosse Bus gsi mit Touris und Iheimische. Der Bus het nisch nach Battambang gfahre. Am Namittag heiwer mit dum Tuktuk en chleini Tour gmacht. Zerscht siwer mim Bamboo Train gfahre. Das sind 2 Achse und uf dene liegt quasi es Floss üs Bambus. Sehr luschtig gsi. MIt dem siwer nar mit 40 km/h durch d Gägend gfahre und hei trocheni Risfälder gseh. Nar siwer ufen Bärg gluffe wos en Tämpel und en schöni Üssicht gka het. Am Abe heiwer nar tüsige va Flädermisch chenne züelüege, wo jede Abe üser Höhli chäment und bis zu 50 km fleigend zum Frässe. Sehr idrücklich gsi. Bis de alli vorna sind, dürets zirka en halb Stund.

04.04.17

Hite am Morge siwer va ischem Tuk Tuk Fahrer Chai abgholt worde und zume witere Tämpel gfahre worde. Schi tient di vorzugwis ufema Hügel erbüe, was zum Besichtige bi uber 35 Grad jewils es vergnüege isch. :-) Wier hei de no chenne lüege wiesch Rice-Paper mächend. Das sind die "Teigjini" wosch ver d Früehlingsrolle brüchend. Der Ris wird zerscht gkocht, de gits en Pampe, dera tientsch z Wasser entzieh (die Pampe wird ines Tüech gita und z Wasser tropft ab. Nar wird die Pampe mit süberem Wasser üfgkocht. Isch nar so wie Omelette-Teig. Der wird de ufes Tüech gleit, wo gspannt isch und uber Dampf liegt. Sobald dases güet isch, wärdentsch ufes grosses Gitter gleit und zum trochne ind Sunna. Uf ma Gitter hent an die 80 Platz, pro 100 Rice-Paper gits 2 Dollar. D Arbeit wird jewils vo 2 Fröie erledigt, die chennend zwische 1500 und 2000 Stuck am Tag mache. 

06.04.17

Gester siwer mim Bus va Battambang nach Kampong Chnang greist. Hite siwer vama Tuk Tuk Fahrer abgholt worde. In der Region wärdent allerhand Töpfersache härgstellt. Är het nisch de d Gägend gizeigt und zu 3 Töpfer-"Firme" gfahre. Die erst hent Keramik-Sache härgstellt. Die fertige Produkt wärdent ine Ofe gleit und der Ofe züegmüret. Nar wird en Teil üfgmacht zum Abchiehle. Na 6 Täg sind d Sache fertig. Bine negste zwei sinds eher Privatpersone gsi. Die einti het in voller Handarbeit grossi Tepf gmacht und d andri mit ra Töpferschiba, wosch mit dum Bei agigä het, chleini Deko-Sache gmacht. Sehr idrücklich. Är het nisch öi no zunera Famili gfahre, wo Palmzucker macht. Die Pflanza wird stunde gkochet und mu verchunt Palmzucker. Der schmeckt es bizi wie Karamel. Nar siwer mal wieder ufen Hügel zunera Tämpelalag gluffe. Am Namittag siwer mit ma Böötli zunera Floating Village gfahre worde, wos ufem Tonle-Fluss het. Die Hüsini sind ufma Art Floss und schwimmend ufems Fluss. Äs het en Schüel, Ichöifslädeli, Fischverarbeitig etc. Sehr spannend gsi durch di Hüsli durchzfahre.  

07.04.17

Hite siwer am 11.15 bim Hotel abgholt worde ver zuner "Bushaltestell". Die isch vor ma Restaurant gsi. Der Bus, wa va irgendwo im Norde isch cho, isch de am zwelfi cho und het nisch mitgno ver uf Phnom Penh. Die nätti Dama van Guesthouse, wo der Bus ver isch gibüecht het, het nisch versicheret, daswer en Platz hei, obwohl das ufem Ticket kei Sitzplatz isch. Wie erwartet isch der Bus brätschvoll gsi und jede zweit Sitz isch scho dopplet beleit gsi. Wier hei de eis z hinderst und eis iner Mitti chenne sitze und zwei Chinder meh hent ufem Schoss vaner Müetter (oder so) gsässe. Isch nisch nit wirkli agnäm gsi. Na anderthalb Stunde hets en Pause gä. epis vor de 3 siwer den in Phnom Penh acho. Der Bus ver nach Sihanoukville isch am gliche Ort abgfahre gäge 15.20. Eigentlich düret d Fahrt va Phnom Penh nach Sihanoukville 4-5 Stunde. epis vor de elfe siwer de öi endlich in Sihanoukville acho.

08.04.17

Hite am Morge siwer ufer Vietnamesisch Botschaft gsi und hei z Visum beantreit. Nar heiwer d Fähre gno ver nach Koh Rong. Ischers Bungalow isch am Coconut Beach gläge. Der Strand isch eine vane schönste, wower je si gsi. Der Sand isch wie Pulver, z Wasser klar und z Meer nit so stürmisch. Eifach es chleis Paradies. 

11.04.17

D letschte 3 Täg siwer uf Koh Rong gsi und hei z Strandläbe gnosse. Gester siwer ga Töiche/Schnorchle, isch sehr schön gsi. Hite heiwer d Fähre wieder zrugg nach Sihanoukville gno. Ufem Vietnamesische Konsulat heiwer ische Pass inklusiv Visum vercho. juhu. 

13.04.17

Gester siwer in 5 Stunde va Sihanoukville nach Phnom Penh gfahre. Hite am Morge isch nisch ische TukTuk Fahrer ver du Tag cho abhole. Är het nisch zum Killing Field Choeung Ek gfahre. Äs git in Kambodscha an die 300 sorigi Killing Fields. Choeung Ek liegt epis üsserhalb va Phnom Penh. Während der Herrschaft vaner Rote Khmer va 1975-1979 sind hie um die 12'000 bis 20'000 Lit umgibrunge worde und in Massegräber vergrabe worde. An die 10'000 Toti hentsch gfunde, schi hent aber nit alles üfgita. In einem Grab hets 166 Kinder und Fröie gka. Da schi Angst vor späterer Rache gka hent, hentsch jewils die ganz Famili umgibrunge. Babys sind ane Fiess ghäbt worde und nar hentsch der Kopf ane Böim gschlage. Susch d Lit hentsch mit Äxt, Bambusstäb, Schüfle etc. (Büüre-Wärchzig) gitetet, Gäld ver Munition hentsch nit gka. Isch sehr bedrickend gsi. D Lit, wo hie gstorbe sind, sind vor allem üsem Tuol Sleng Gfängnis in Phnom Penh cho. Das siwer im Aschluss öi no ga alüege. Das Gfägnis isch inera ehemalige Schüel gsi. Ine Klassezimmer hentsch Wänd drigita wo knapp en halbe Meter breit und 1.5 Meter läng sind gsi. Da sind de nar 1-2 Häftlinga dri gsi. Hie hentsch d Lit mit Folter zuma Gständnis gizwunge. Sobald dasch z Gständnis gka hent, sindsch nach Choeung Ek cho. Mu weiss nur va 12 Uberläbende va dem Gfängnis. Inhaftiert sind zwische 20'000 und 40'000 Lit gsi. Die ganz Gschicht geit einem sehr na. Wener Fotos wellet gseh, miesse ders google, sorry, hei nit mege fotografiere.

14.04.17

Hite isch Khmer-Neujahr, ganz Kambodscha steit ver d negste 3 Täg still. D Stadt isch wie üsgstorbe. Fasch kei Verkehr. Si der Tämpel Phnom Wat, der Königspalast und der Central-Market ga alüege. Am Market isch nit viel offe gsi. Am Namittag siwer biz durch d lääre Strasse gluffe.