Neuseeland

13.02.17

Wier si am 13.02.17 güet in Christchurch glandet und hei 2 schöni Täg in der Stadt verbrunge. Durch d Ärdbäbe vam 2010 und 2011 isch d Stadt starch giprägt. Äs het sehr viel Baustelle und no sehr viel Ruine. Bim Hafe hentsch vieli chleini Gschäfter in Schiffscontainer gita. Gseht no güet üs. 

15.02.17

Hite heiwer ische Camper uberno. Är het en stattlichi Längi. :-) Der Ralf fahrt isch aber sicher durch die kurvige, zum Teil änge Strasse. Das mim Links-Verkehr löift öi güet. Hite siwer mal no nit so wit gfahre und hei en tolle "Parkplatz" diräkt aner Bucht vor Akaroa. Chostet nix, het aber öi nix üsser en tolli Üssicht und Lag.  

16.02.17

Hite siwer va Akaroa nach Oamaru gfahre. Am Namittag siwer biz im Städtli gsi, isch no härzig. Hie hentsch friener Whisky gibrännt. Jetz tiensch no di letscht Fässer verchöife, sehr zer Fräid vam Ralf. Am Abe siwer ga Blaui Pinguina lüege. Di sind der ganz Tag im Meer und chämend am Abe an Land zum d chleine füettere. Isch sehr härzig gsi. Zum Schutz vane Pinguina darf me kei Foto mache, darum miesse der schi google, wener schi welt gseh :-)

17.02.17

Nam Ichöife iner örtlich Käseri siwer zu Moreaki Boulder gfahre. Das sind rundi Steina bim Meer. Hei nit üsagfunde warum die da sind. Uf jede Fall sindsch nit Mänschegmacht. Sehr schöne Strand. Am Namittag siwer nach Dunedin gfahre zer steilstesch Strass ufer Wält. Si embrüf und wieder embri gluffe wie apa jede Tourist in Dunedin. Anschliessend siwer witer ufi Otago Halbinsel. Da heiwer Königsalbatrossa gseh und vili Seelöwe. 

18.02.17 - 19.02.17

Na dum Stadtrundgang durch Dunedin inklusive dera Parade va Dudelsackspieler und Trummler siwer zer Catlins Coast gfahre. Da heiwer zwei wunderschöni Täg verbrunge. Isch en sehr en schöni Region mit viele Buchte, griene Hügla und viele Schaf. Am Abe heiwer bim Nugget Point d sältene Gelbaugenpinguina gseh üsem Meer cho ver ihri Junge z füettere. Sehr idrücklich. Am Abe siwer bis Bluff gfahre und si d Fähre ver more ga büeche ver nach Stewart Island.

20.02.17

Hite siwer der ganz Tag uf Stewart Island gsi. Das isch en Insla südlich vam Festland. Mit der Fähre heiwer en Stund gka zum uberfahre. Isch sehr schön da. Wier hei de so en Tageswanderig gmacht ume Höiptort Oban. Ver di ganz Insla z gseh, miessti mu Mehrtageswanderige mache, da der gregst Teil vaner Insla nur z Füess z erreiche isch. 

22.02.17

Wier si hite bim Milford Sound gsi. Das isch en Fjord, wo bis zur Tasmanische See geht. Isch en sehr schöni Schiffsfahrt gsi. Obwohl dases gester wie öi iner Nacht grägnet het, heiwer güets Wätter gka. Na der Schifffahrt siwer zrugg uf Manapouri gfahre und hei d Milford Road gignosse. 

23.02.17

Hite siwer zum Doubtful Sound gange. Ver zu dem z glange, nimmt me zerscht z Boot uber du Lake Manapouri, denn der Car uber du Wilmot Pass und nar geit me wieder ufes Schiff. Di Strass isch mit keiner andere Strass verbunde und isch gebüt worde wägem Chraftwärch wos da het. Wier si wieder mim Schiff bis ini Tasmanische See gfahre. Isch sehr schön. Hei ufem Rückwäg Delfina und en Fjordland-Pinguin gseh.

24.02.17

Am Morge siwer zuner Glowworm Caves gange. Das isch sehr idrücklich gsi. Zerscht löift mu es bizi in en Höhli, äs wird immer dunkler. Fasch so wie ine Beatushöhline. Z Hinderst bestiegt me es chleis Böötli. Der Guide zieht einum de im fiestere an Schnier durch der hinderst Teil vaner Höhli zune Glüehwürmli. Di sind zu tüstige aner Decki und lüchtent. Willsch Liecht.und Lärmempfindlich sind, isch absoluti Stilli und abgseh va ihrem Lüchte öi dunkel. Das isch eifach nur toll gsi. Am Namittag siwer uf Queenstown gfahre. Das isch eifach nur touristisch. Eis Motel, Appartement-Hotel und Hotel nam andere. Het nisch gar nit gfalle. Si de fere Sunneundergang mim Bändli embrüf ufen "Bärg" gange. D Üssicht uber Queenstown und der See sind sehr schön gsi. 

27.02.17

D Letschte zwei Täg siwer va Queenstown uber Wanaka nach Fox Glacier gfahre. D letscht Nacht heiwer ufema "Camping" verbrunge, wo der Name nit wirkli verdient. Der Stellplatz isch der Parkplatz vaner Big Foot Bar und Restaurant gsi, z WC und die Dusch heiwer vam anliegende Motel derfe brüche :-) Am Morge siwer den zum Fox Glacier gluffe. Die Üssichtsplattform isch relativ wit wäg wäge der Sicherheit. Bim Gletscher sind scho Lit gstorbe willsch z noch sind gsi und de epis abbroche isch. Wier hei nisch de gideicht, die Üssicht längt nisch nit und hei en Heli-Rundflug uber du Fox Glacier, du Franz Josef Glacier und zum Mount Cook, dum hegste Bärg z Neuseeland gmacht. Das isch sehr idrücklich gsi. 

27.02.17 Abe

Nach dem Heli-Flug siwer uf Hokitika z fahre. Warum das wer en eigene Iträg mäche, isch der Stellplatz va hite Abe. Wier hei hite ische Camper ufem Parkplatz vanera ehemalige Psychiatrische Klinik giparkt und hei d Irichtig vaner Station gibrücht (WC, Kuchi, Dusch, Üfenthaltsrüm etc.). D Lag isch eimalig erhöht uber Hokitika mit Blick uf z Städtli und z Meer. Alles isch sehr spannend gsi. Na lüt der Irichtig isch die Klinik vane 50, 60 Jahr. Wier wisse nit, sit wenn dasch nimme in Betrieb isch. Hei aber sehr güet gschlafe, veli sind ja no Räschte va Beruhigungs- oder Schlafmittel iner Luft gsi ;-)

28.02.17

Hite siwer bine Pancake Rocks gsi. Das sind Fels-Formatione aner Westküsta. Gseht üs wie üfgreiti Pancakes. Sehr schön zum Alüege. 

02.03.17

Hite siwer im Abel Tasman National Park ga wandere. Der NP liegt aner Küsta, ver du ganz Track z löife, brüchts mehreri Täg. Mu cha schich aber mim Boot zuma Strand la fahre und va da üs ei Teil löife. Wier si den va Bark Bay nach Anchorage gluffe, het mit de Abstächer wower gmacht hei apa 14 Kilometer gigä. Wiener che chent deiche, heiwer nar am Abe nix meh gmacht und si sehr früeh in en tiefe Schlaf kit :-)

04.03.17

Gester Namittag siwer in Nelson acho und si biz im Städtli gsi. Ubernachtet heiwer ufem Parkplatz vam Supermarkt. :-) Hite Morge siwer ufem Markt gsi und nar uf Picton gfahre. Am Namittag heiwer en Wi-Tour gmacht. Hie im Nord-Oste vaner Südinsla sind 3/4 vane Räbe va ganz Neuseeland. Si in 4 Winerys gsi und hei nisch durchprobiert (nit das wer nit scho Wi gka hätti ;-)) Der Sauvignon Blanc schmeckt biz wie Passionsfrucht-Saft, wiesch dasch schaffend mit Tribil verstäwer nit. Der Riesling und öi der Pinot Gris sind güet. Rote chennentsch nur Pinot Noir apflanze wägem Wätter, öi der isch nit schlächt. Hei nisch de ver d negste Täg mit Wi igideckt.

05.03.17

Hite isch ische letscht ufer Südinsla, more näme wer d Fähre nach Wellington. Der Ralf isch hite Morge ga töiche. D Sicht isch zwar nit so toll gsi, aber susch isches super gsi. Die Barbara isch ufera Bootstour durch d Marlborough Sounds gsi inklusive Bsüech und Wanderig ufera Insla. 

07.03.17 - 08.03.17

Gester siwer mit der Fähre va Picton uf Wellington gfahre. D Uberfahrt isch sehr ruhig gsi. Wier hei nar zwei Täg in Wellington verbrunge und si en ganze Tag im Museum Te Papa gsi. Das isch z Museum uber Neuseeland. Isch ziemli gross und sehr interessant. Am negste Morge siwer nar zu Weta Workshop gange und hei zwei Toure gmacht. Die Firma isch iner Filmbranche tätig und macht zum eine Digitali Sache aber öi Waffe, Schärter, Schilder, Rüstige etc. üs Plastik!! oder Stahl ver Filma wie zum Bispil Herr der Ringe, der Hobbit, District 9, Avatar etc. Das isch sehr interessant und erstünlich gsi.  

11.03.17

Wier si d letschte Täg va Martinborough uber Ohawe Beach um du Mount Taranaki nach Stratfort gfahre und hei va da üs der Forgotten World Highway nach Taumarunui gno. Landschaftlich sehr en schöni Gägend. Hite heiwer vo Taumarunui en Tour gmacht mit umgebaute Golf-Wäge, wo uf Schiene chennent fahre und si mit dene 40 Kilometer gfahre. Sehr schön gsi. Im Aschluss siwer mit ma Jet-Boat (das fahrt zimli schnäll ohni dases wirkli schobblet) ufem Whanganui River zrugg uf Taumarunui "gschwäbt". Underwägs heder es paar mal gidräht, wirkli cool gsi. 

13.03.17

Hite am Morge siwer im Wai-O-Tapu Wonderland gsi. Da hets en Geysir und susch no Geothermali Aktivitäte. Isch sehr schön mit de verschiedene Farbe. Der Geysir wird jede Morge um 10.15 "üsglest". Schi tient Seifa dri und na es paar Minüte spritzt z Wasser ind Hechi. So ischer vor uber 100 Jahr öi entdeckt worde, wo d Lit in dem heisse Wasser ihri Wäsch gwäsche hent unds nar gspritzt het :-) Isch zwar schön aber nix im Verglich zu dem uf Island.

14.03.17

Hite am Morge siwer z Whatakane uf z Schiff gange und nach White Island gfahre. D Uberfahrt het 1.5 Stunde düret und äs het sehr gschobblet. d Hälfti vane 40 Lit ufem Boot hent schich miesse ubergä. Wier si verschont worde. Z White Island acho, heiwer en Rundwanderig zum Aktive Vulkan gmacht. Sehr idrücklich gsi. Är bricht immer mal wieder üs, jedoch nit grossi Üsbrich. Der letzti chleini isch vor 3 Wuche gsi, der letzti grossi im April 2016. Vor epis weniger als 100 Jahr hentsch da öi Schwäfel abgibüt, aber d Firma isch bankrott gange und en Famili het d Insla gchöift. Jetz wärdend sit apa 10 Jahr Touriste mit dum Boot ubergfahre. 

15.03.17

Hite am Morge siwer va Rotorua nach Waitomo gfahre. Am Namittag heiwer di Höhline um Waitomo bsüecht. Der Ralf het es Blackwater Rafting gmacht mit Abseile, chlättere, ufem Gummiboot ufem underirdische Fluss gfahre etc. Die Barbara het 3 Höhline z Füess bsüecht. Isch ver beidi sehr idrücklich gsi vor allem di Glühwürmchen. 

16.03.17

Hite siwer eigentlich mehrheitlich gfahre va Waitomo nach Matamata. Wower z Raglan si im Restaurant Orca gsi, wo diräkt aner Bucht liegt, heiwer am ander ändi vaner Bucht Orcas gseh. Schi sind leider z wit wäg gsi, als das wer schi güet gseh hätti. Trotzdem sehr spannend gsi. Am Abe heiwer bima Büür ufem biz Rase hinder schinum Hüs gschlafe. ze halbe sägsche chunder (wier hei gat je es Bier iner Hand) obwer epis ver ihne chenne mache, vam Büürli dernäbe d Müeter sige gstorbe. Wier miesse de öi nix zahle ver d Ubernachtig. Ob wer nit ver ihne chenti d Lit empfah, ne alles zeige (spricht d Warmwasserdusch und z WC, meh hets nit gka ;-)) und ikassiere. So siwer zuma Job in Neuseeland cho ;-) het no Spass gmacht und wier hei därfe witer triche ;-)

17.03.17

Hite am Morge heiwer en Tour durch Hobbiton gmacht. Der Peter Jackson het hie scho d 3 Herr der RInge-Filma gidräit aber de alles wier abgibut. Woner de d Inhaber vam Land isch ga fräge, ober di Hobbit-FIlma öi wieder da därfe dräie, hentsch beschlosse, z Set z la sta und ver Touris z öffne. Darum chame jetz d Heimat vam Frodo und Sam ga alüege :-) Isch sehr schön gsi. Wier hei de ufer Tour zwei Bärner kenne glehrt und da schi de gat ini glich Richtig (Coromandal)  hent welle, siwer am Abe ufe glich Camping. isch sehr nätt gsi.

18.03.17

Der hitig Tag heiwer wieder mit "ische" Bärner verbrunge und si nam Mittag zum Cathedral Cove gluffe. Sehr schöni "Wanderig" gsi. D Männer sind sogar im Meer ga bade, de Fröie isches z chalt gsi. Am spätere Namittag siwer zum Hot Water Beach gange. Da chame 2 Stunde vor und nach der Ebbe es Loch ine Sand grabe und va unina embrüf chunt heisses bis chochents Wasser. Wier hei nisch de en ordentliche Pool gigrabe und hei schön im Warme de Wälle chenne züelüege. Kei 5 Sekunde nadem daswer si drüsgange het en Wälla ische Pool under schich begrabe. 

19.03.17

Hite heiwer no der Räscht vaner Coromandel Peninsula aglüegt und si in Thames iner alte Goldmine gsi. Hei uner Tag chenne ga lüege wiesch friener Gold gförderet hent. Elei in der Mine hentsch 60 Tonne Gold gförderet. Isch interessant gsi. Am Namittag siwer Richtig Auckland gfahre und hei in Ramarama ubernachtet (mit ische zwei Bärner)

21.03.17

Wier si gester durch Auckland nach Whangarei gfahre. Hite isch der Ralf ga Töiche bine Poor Knight Island. Der Töich-Spot wird von Jacques Cousteau als eine vane 10 beste vaner Wält gnännt und der Ralf isch schiner Meinig. Är het sehr viel gseh. 

23.03.17

Gester siwer nach Ahipara gfahre und underwäg no z Russel gsi. Das isch bis 1840 d Höiptstadt gsi va Neuseeland. Nar isches bis 1865 Auckland gsi und sit denn Wellington. Hite siwer bim Bus bis z Oberst ans Cape Reigna gfahre. Higändige isch der Bus am Strand ufem Sand gfahre und wier hei binera Sanddüne chenne Sandborden ufem Büüch. Isch sehr luschtig gsi. D Maori glöibent, dass d Seele vaner Verstorbene uber z Cape nach Hawaiki gänt.

24.03.17

Gester siwer aner Westküsta vam Northland gsi und ga Kauri-Bäim alüege. Die sind zum Teil uber 2000 Jahr alt. Wier hei eine gseh mit ma Druchmässer va 3.5 Meter, wo 1200 Jahr alt isch. Hite siwer nar bis ine Norde va Auckland gfahre und am Abe mit "ische" Bärner ans Rugby-Game Blues gäge Bulls gange. Isch luschtig gsi und die Blues hent gigwunne. 

28.03.17

Am Sunntag, 26.03.17, heiwer der Camper zrugg gigä und heis es Hotel-Zimmer in Auckland bezoge. Gester siwer ufera chleine Vulkan-Insla vor Auckland gsi. Isch sehr schön gsi. Hite siwer ufem Sky-Tower gsi, isch z hegsti Gebäude va Neuseeland. Mu het en schöni Üssicht. Iner Nacht uf more fleige wer uf Kambodscha. Wier si scho sehr spannt uf z Land und d Lit.