Seychellen

19.05.17 - 28.05.17

Am 19.05. am Morge siwer ufe Seychelles glandet und hei der Tag am Strand va Beau Vallon verbrunge. Vam 20.05 bis 27.05 siwer ufem Sägelschiff Sea Star gsi und si va Mahé nach Praslin und La Digue gfahre und hei öi no d Insle Cousin und Curieuse bsüecht. Cousin isch en privati Insla, wo nur es paar Wisseschaftler wohnend. Uf der Insla het vili Vegel und öi Schildkröte. Uf Curieuse isch en Rieseschildkröte-Üfzucht und äs het vili Kräbsli. Uf Praslin siwer im Vallée de Mai gsi und hei di Palme mit de Coco de Mer gseh, di brüehmte Kokosniss, wos nur da git. 

Hei en super Wucha ufem Schiff gka mit 2 andere Paarli und hei jede Tag chenne schnorchle und töiche. Der Ralf isch mit einum Paarli ga töiche und di Barbara mim andere ga schnorchle. D Stränd sind wunderschön (bsunders Anse Lazio) und z Wasser kristallklar. Bim schnorchle heiwer Eagle Rey, Sting Rey, Turtle, Lion Fish etc. gseh. Bim Töiche isches ähnlich gsi, üsser das di Töicher no Haia und Sepien gseh hent. Bim Fische hent de öi d Schnorchler no en chleine Hai gseh :-) Di Barbara het 3 Fischi an Land gizoge, der Ralf en Barracuda. D andere Gäst sind weniger erfolgrich gsi. Ver 6 Gäst sind sage und schreibe 9 Lit ufem Boot gsi, vam Kapitän uber Matrose, Mechaniker, Töichlehrer und Hostesse. Sind alli sehr lieb gsi. Z Ässe isch sehr fein gsi und immer viel z viel. Hei gar nimme va Board welle. Der letschti Tag heiwer de no numal am Strand va Beau Vallon verbrunge und am Sunntag morge siwer denn uber Dubai nach München gfloge.