Vietnam

16.04.17

Gester siwer mim Bus bis ani Gränza und nar mim Boot uber du Mekong nach Chau Doc, Vietnam. Het alles güet giklappt mit dum Gränzubergang und isch zügig voragange. Wier hei eigentli gmeint, wier heige eifach d Fahrt bis nach Phu Quoc (isch en Insla vor der Küsta va Vietnam) gibüecht. Jedoch siwer gester Namittag no inen chleine Nationalpark gange und hei da en Bootsfahrt gmacht. Isch sehr nätt gsi, wier und susch nur vietnamesischi Touris :-)

Hite siwer denn am Morge zum floating market va Chau Doc, zunera Fischfarm (Da het es Floating Hüsboot en Chäfig under dum Hüs mit Fischini dri) und nar no zuma Cham-Dorf gange. Das isch en muslimischi Minderheit hie in Vietnam. Hei chenne lüege wiesch wäbend und no chenne ga en Moschee alüege. Nar siwer mim Bus nach Ha Tien gfahre, wieder wier und Vietnamese, ohni Klima und der Platz näbe der Port het schi vaner Bus-Gsellschaft gka, willsch het va Hand miesse die Port züeha ;-) In Ha Tien hentsch nisch mit dum Töffli welle zum Hafe fahre, mit ischem Gepäck hahaha. Hei de es Taxi gno ;-) d Uberfahrt mit der Fähre isch sehr ruhig gsi. In Chau Doc hentsch nisch scho gseit, wier selle de z Phu Quoc der Bus ind Stadt nä, das sige günstiger als es Taxi und wier chennige de ab der Stadt es Taxi zum Hotel nä. Gesagt, getan. Iner Stadt acho heiwer öi nit allzulang nama Taxi miesse süeche. Der Taxi-Fahrer het gar kei Änglisch chenne. Wier hei mu de z Hotel gseit und d Adräss gizeigt. Scho siwer underwägs gsi. Binera Baustell heder ghaltet und gseit, wieder sige da. Wier si de ga fräge. Isch de nit ischers Hotel gsi. Är isch denn der Strass witer gfolgt, Teer isch verschwunde, Sand isch cho. Es paar Mal ischer üsgstiege und ga lüege, ober cha witerfahre. Irgendwenn heder nimme welle ufem Sand witerfahre und wier heimu z Nummer gigä vam Hotel. Är het den aglitet und gmerkt, dasser no lang hätti der Höiptstrasse chenne folge und isch alles wieder zruggfahre. Na dra gfühlte Ewigkeit siwer im Hotel acho. Isch en schöni Alag mit 5 Bungalows gsi. 

18.04.17

Gester heiwer nisch es Auto mit Fahrer gno und si mit dem d Insla ga alüege. Si im Coconut-Prison gsi, da hent d Südvietnamese mit de Amis im Vietnam-Chrieg d Vietcong inhaftiert und grausam gfolteret. Si no inera Pärle-Fabrik  gsi, binera Pagode und no biner Fisch-Sauce-Fabrik. Hei am Mittag bima wunderschöne Strand chenne Ässe und relaxe. Hite siwer mim Boot bim Hotel näbedra abgholt worde und si ga Töiche/Schnorchle. Isch sehr nätt gsi, hei viel gseh, obwohl z Wasser nit so klar isch gsi. 

20.04.17

Gester siwer mim Taxi zum Hafe, mit der Fähre nach Rach Gia und nar mim Bus nach Can Tho gfahre. Hite am Morge het nisch d Susan abgholt. Das isch en Iheimischi, wo hie Toure durch z Mekong Delta abietet. Si denn mim Bus ines Dörfli gfahre, hei mit ihra z Mittag gässe. Nar isch nisch ihre Papa cho abhole mim Boot und het nisch umenandgfahre. Hei chenne ga lüege, wiesch Setzlinga apflanzend, Ris trennend und wiesch Strohdächer mächend. Hei de öi därfe hälfe bine Strohdächer, isch no luschtig gsi. Nar siwer ufen Markt gange und hei ver z Nacht igköift. Mim Boot siwer denn zum Hüs va ihre Eltre gfahre. D Eltre wohnend da mit der Grossmüeter. Am Abe heiwer de chenne hälfe choche. Äs het frittierte Tofu, Schwii in Sauca, Gurke in Suppa, Morning Glory (Wasserspinat) mit Chnoblauch und natirli Ris gigä. Zum Dessert hets Cake giga, heiwer öi sälber gmacht. Zerscht heiwer Kokosflocke mit biz Wasser vermischt, nar üsgidrickt ver Kokosmilch. Die heiwer mit Rismähl (oder so, wer weiss das scho so genau :-)) vermischt. Das git en rächt chläbrigi Pampe. Die heiwer nar uf Blätter gstriche und das wird gedämpft. Nar chames abem Blatt nä und iner Kokosmilch tünke. Konsistänz isch fasch so wie Gummibärli, der Gschmack aber viel besser. Isch lecker gsi. Nam Ässe het nisch der Vater mit Ris-Schnaps abgfillt und wier hei den typisch Asiatisch mit der Susan Karaoke gsunge. Sehr luschtig gsi. Die Grossmüeter het im Zimmer dernäbe gibätet. 

21.04.17

Hite am Morge am Füfi het nisch der Vater und der Cousin mim Töffli zuma Taxi gfahre, wo d Susan uf isch gwaret het (schi isch scho vorhär gfahre worde willsch nur 2 Töffli hent). Mim Taxi siwer denn zur Böötli-Haltstell (Hafe isch das nit gsi, si uber Küder zum Fluss gluffe) gfahre und nar mim Böötli zum Floating Market Cai Rang gfahre. Das isch der gregsti Floating Market im Mekong. Di grosse Schiffi mit der War verchöifend hie an chleini Schiffi und die chleine verchöifends nar an Land an en witere Händler. Derzwische hets no Böötli mit Ässe und Triche. Hei de es Tee vam floating "Starbucks" und es Brötli mit Soja-Sauca und Gmiess vam floating "Subway" und Nudelsuppa gka. Sehr lecker gsi. Nar heiwer ufes grosses Boot chenne ga und hei no Ananas vercho. Nam floating market siwer zuner Ris-Nudel-Fabrik gange und hei därfe hälfe. Zerscht wird der Teig uber dum Dampf gigart, nar iner Sunna gitrochnet (Wie Ris-Papier z Kambodscha). Nar wirder durch en Maschina gla zum schniede. Sehr spannend gsi. Zum Schluss siwer no zuma Früchtegarte gange und hei no chenne Fricht probiere. Mit dum Boot und Taxi siwer denn wieder nach Can Tho gfahre. 

24.04.17

Vorgester siwer mit dum Bus va Can Tho nach Ho Chi Minh gfahre. Gester am Morge siwer mit ra Tour zune Cu Chi Tunnel gfahre. Das sind underirdischi Gäng uf verschiedene Äbine (3 Meter, 6 Meter und 8-12 Meter underum Bode). D Vietcong hent da alles gmacht, gkochet, Schüel gka, gläbt, schich fortbewegt etc. Sehr idrücklich gsi. Hite siwer im War Remenand Museum gsi. Da wird der Vietnam-Krieg erklärt inklusive viele Bilder. Das isch sehr bedrückend. Am Namittag siwer biz durch d Stadt gluffe.  

26.04.17

Gester siwer mim Bus va HCM nach Mui Ne gfahre und am Abe acho. Am Morge am 4.30 siwer vama Jeep abgholt worde und zum Sunneüfgang zu Sanddüne gfahre worde. Sehr schön gsi. Im Aschluss siwer no zu rote Sanddüne gfahre und zum Schluss no zuma chleine Fluss, wower 1 Kilometer hei chenne entlang löife, wos schöni Steiformatione gka het. Zum Früehstuck siwer wieder im Hotel gsi und hei am Namittag der Bus nach Nha Trang gno.

29.04.17

D letschte zwei Täg siwer in Nha Trang gsi. Isch nix speziells, het en schöne Strand und vil Russe. Z Besta isch z Restaurant Swiss House gsi. Das wird vam Hugo üs Luzäre gfiert. Är importiert üser Schwiz Fondue und Raclett-Käs. Hei de beides gitestet und isch beides sehr fein gsi. Der Ralf isch ei Tag no ga töiche, das isch güet gsi. Susch siwer vor allem am Strand gsi oder susch gmietli iner Stadt. Hite am Morge hätti wer am 8i ufe Bus selle ver nach Da Nang. Die Fahrt düret 12 Stunde. Pünktlich am 7i siwer bim ichecke gsi. De hets gheisse, der Bus heigi 2 Stunde verspätig, wier chenne umenand löife und de am 10.30 wieder cho. Hmmmm passt ja nit ganz ;-) am 10i siwer de mit ma chleine Bus vaner Stadt zum Busbahnhof gfahre worde (isch hie normal, der Busbahnhof isch immer es paar Kilometer üsserhalb vaner Stadt). Epis na de elfe isch de ische Bus ändli gfahre und si nach 12 Stunde in Da Nang acho. 

30.04.17

Der hitig Tag siwer in Da Nang gsi. Das isch rächt en grossi Stadt, het aber nit viel zum gseh. Wier si im Cham Museum gsi. Das isch en Minderheit hie in Vietnam, wo vor 1000 Jahr no hie agsiedlet isch gsi. Jetz läbent d Cham-Lit nur no im Süde. Am Abe hets wägem Firtag (Tag der Befreiung) zwei riese Firwärk (je uber 30 Minüte) gigä. Heis z spat erfahre, erst bim z Nacht, drum heiwer schi im TV gseh, sehr idrücklich.

02.05.17

Gester siwer mim Auto va Da Nang uf Hoi An gfahre. Am Namittag siwer iner Altstadt gsi. Das isch sehr härzig. Hite am Morge siwer ufen Tour gange und si mit Basket Boats gfahre, inkl. Krabbenfischen. Das sind chleini rundi Böötli, alles üs Kokospalme gmacht (Palme, Öl etc.) Sehr luschtig gsi. Am Namittag siwer nach My Son gfahre. Das isch en Tämpel-Alag vane Cham-Lit, wosch vor uber 1000 Jahr gibut hent. 

03.05.17

Der letschti Tag in Hoi An heiwer uf Cham-Island verbrunge. Das isch en Insla e halb Stund vam Festland empfärnt. Wier si de ga schnorchle und hei no am Strand chenne gmietli bädele. Der Üsflug an schich isch nix speziells gsi, nur das wer di einzige Europäer si gsi näbe 4 Vietnamese und 30 Chinese. Isch sowit interessant gsi als das Asiante nit chennent schwimme und wier si ga schnorchle :-) Alli mit de Schwimmweste im Wasser mit ra Maska üsem letschte Jahrtüsig (Schnorchel hentsch gar keini gka) biz am plantsche. Na 10 Minüte hentsch de gnüeg gka und wier hei de öi drüs miesse. Mit ischer Maska und dum Schnorchel si wier es beliebts Fotomotiv gsi ;-) Zum Mittagässe hentsch de ordentlich (oder öi nit, willsch nix verträgend) gibächeret und d Rückfahrt isch de eis gsinge und gjöhle gsi. Hei ische Gspass gka.

05.05.17

Gester siwer mim Bus va Hoi An uf Hue gfahre. Hue isch di Königsstadt und isch friener d Höiptstadt va Vietnam gsi. Si hite ufera Stadtrundfahrt gsi und hei der Königspalast und 2 Gräber va 2 Königa aglüegt. Hei öi no gseh wiesch Röicherstabini mächend und hei sälber chenne probiere. 

06.05.17

Hite siwer im Phong Nha Nationalpark gsi und si iner Paradise Cave/Thien Duong gsi. In dem Nationalpark hets vili Höhline, zum Teil erst sit es paar Jahr entdeckt. Die Paradise Cave isch 31.4 Kilometer läng, 60 Meter breit und 100 Meter hoch. Der 1 Kilometer chame güet gsüeche, äs gäbi no en Tour ver die erste 7 Kilometer (düret de aber länger). D Fahrt va Hue mim Bus zum Nationalpark het scho 4 Stunde düret, darum heiwer nur der 1 Kilometer bsüecht. Isch sehr idrücklich gsi. Die Höhli isch troche, äs het also kei Fluss wo durchgeit. Anderi va ischem Bus sind mit dum Boot in en anderi Höhli gange, sige öi schön gsi. Spat am Abe siwer denn wieder zrugg z Hue gsi. 

07.05.17

Hite siwer am Morge va Hue uf Hanoi gfloge. Am Namittag siwer biz iner Altstadt va Hanoi umenand gluffe und öi no ume See, wo iner Stadt het. Isch sehr es härzigs Städtli. Wower ume See si gluffe, hent nisch vili Studänte agsproche, obwer mit ihne chenne biz änglisch rede, schi welle iebe. Isch no interessant gsi. 

09.05.17

Wier hei en Cruise iner Halong Bay gibüecht gka ufer Dragon Pearl. Üs unbestimmte Grind het die aber doch nit chenne fahre, darum heiwer es Upgrade ufi Dragon Legend vercho, wo vil luxuriöser isch. Gester am Morge siwer vama Luxus-Van abgholt worde und zum Hafe in Halong gfahre worde. Am Mittag siwer denn uf z Schiff Dragon Legend gange und hei z Mittag gässe. Z Schiff het den am Namittag Anker gleit und wier hei chenne mim Kayak zum Strand paddle. Am Strand heiwer denn chenne bade, isch sehr schön gsi. Am Abe nam z Nacht het denn d Crew no gsunge und Instrumänti gspielt, isch sehr nätt gsi. Hite am Morge heiwer afa mal Tai Chi gmacht und nar hets z Früehstuck gigä. Z Schiff isch denn zuma Inseli gfahre, wos en Höhli het. Wier hei di de chenne bsüeche, isch härzig gsi. Nar siwer wieder zrugg nach Halong gfahre und der Van het nisch ufem Rückwäg nach Hanoi no zunera Waterpuppet-Show gfahre. 

10.05.17

Im Norde va Hanoi hets vili Bärga. Sapa isch sehr bekannt und wird va vili bsüecht. Wier hei nisch aber ver d Region um Ha Giang entschiede. Das isch aber no nit so sehr touristisch und cha nit mit ra Tour bsüecht wärde. Mu cha sälber fahre oder schich la fahre. Wier hei nisch ver letschteres entschiede. Am Morge isch nisch de der Fahre und der Guide im Hotel cho abhole und wier si nach Ha Giang gfahre und hei z MIttag gässe. Am Namittag siwer witer nach Nam Dam und hei nisch es Homestay gsüechet. In dem Dorf wohnend Lit vaner Minderheit der Dao und äsgit apa nur 15 Hüser und d Hälfti bietet Homestay a ;-) Wier hei den ganz en nätti Famili gfunde, wo öi Vietnamesisch het chenne. Die hent zimli vil Zimmer und der Abe isches zimli voll gsi. Äs het en Gruppa va Belgier, Kanadier, Vietnamese und Inder gka. Am Abe hent alli zäme gässe inklusive de Gastgäber. Isch sehr luschtig gsi. Zum Ässe wird hie Ris-Wi gitrüche, wobi der an die 30% het :-). 

11.05.17

Nama super Früehstuck siwer nach Dong Van gfahre und hei da z Mittag gässe. Am Namittag siwer nach Meo Vac gfahre uber die gfährlichsti Strass va Vietnam (so heissets emil). Isch sehr en schöni Strecki. In Meo Vac gits nit vil z gseh d Wucha durch. Am Sunntag heiges ganz en schöne Märit. Wier si de wieder zrugg nach Dong Van und hei da ubernachtet. 

13.05.17

Gester siwer va Dong Van zrugg nach Hanoi gfahre. Underwägs heiwer es paar mal ghalte ver Foto oder Pause. Am 6i siwer denn schlussendli in Hanoi acho. Hite siwer biz durch d Stadt gluffe und si z Ho Chi Minh-Mausoleum und di Temple of Literature ga alüege. More fleige wer nach Singapur und die 30 Täg hie in Vietnam ändet.